Azərbaycanca

XƏBƏR

Almatıda Ermənistanın Azərbaycana qarşı işğalçılıq siyasəti ilə bağlı məlumatlandırma konfransı keçirilib

22.05.2017 | 12:57

5648

Qazaxıstanın Almatı şəhərində “Ermənistanın Azərbaycana qarşı həyata keçirdiyi işğalçılıq siyasəti nəticəsində yaranmış regional təhlükə barədə beynəlxalq ictimaiyyətin məlumatlandırılması təşəbbüslərinə dəstək layihəsi” çərçivəsində konfrans keçirilib.

Konfransda çıxış edən Milli Məclisin deputatı, professor Elman Nəsirov Prezident İlham Əliyevin xarici ölkələrdə yaşayan azərbaycanlıların Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasında mühüm rolunu hər zaman yüksək qiymətləndirdiyini diqqətə çatdırıb. O, Qazaxıstanda yaşayan soydaşlarımızın da bu prosesdə fəal iştirak etdiyini vurğulayıb.

Konfrans çərçivəsində Azərbaycan Prezidentinin ictimai-siyasi məsələlər üzrə köməkçisi, professor Əli Həsənovun 8 dildə nəşr olunmuş “Xocalı soyqırımı: səbəbləri, nəticələri və beynəlxalq aləmdə tanınması” və “Azərbaycanlılara qarşı etnik təmizləmə və soyqırımı siyasətinin mərhələləri” kitablarının təqdimatı da olub.

Qazaxıstan Xalqları Assambleyası sədrinin müavini Əbülfəz Xamedov bu cür tədbirlərin Qazaxıstanda təşkilinin xüsusi önəm daşıdığını, Azərbaycan həqiqətlərinin qardaş qazax xalqına çatdırılmasında vacib rol oynadığını qeyd edib.

Azərbaycanın Qazaxıstandakı səfirliyinin Almatı şəhərindəki konsulu Nizami Rüstəmov ölkələrimiz arasındakı strateji tərəfdaşlıq münasibətlərinin formalaşmasında dövlət başçılarının xüsusi roluna diqqət çəkib. O, Prezident Nursultan Nazarbayevin Azərbaycana səfəri çərçivəsində “Heydər Əliyev” ordeninə layiq görülməsini ikitərəfli münasibətlərin yüksək göstəricisi kimi xarakterizə edib.

Qazaxıstan “Dostluq Evi”nin direktoru Qulsim Omarovna isə bu il Qazaxıstan Xalqları Assambleyasında Prezident Nursultan Nazarbayevin müavinlərindən birinin azərbaycanlı seçilməsini, bu ölkədə yaşayan soydaşlarımıza dövlət başçısının böyük etimadının göstəricisi kimi dəyərləndirib.

Azərbaycan və qazax xalqlarının ortaq dəyərləri paylaşdığını və dərin tarixi tellərlə bir-birinə bağlı olduğunu qeyd edən Gənc Diplomatlar Birliyinin sədri Eltun İbrahimov gənclərin diasporun fəaliyyətində və ölkələrimizin qarşılıqlı münasibətlərində daha fəal olmasının vacibliyini vurğulayıb.

Qazaxıstan Azərbaycanlıları Assosiasiyasının sədr müavinləri Şahverdi Babayev, Qəhərman Sadiyev, Beynəlxalq Qızıl Xaç və Aypara cəmiyyətlərinin Mərkəzi Asiya təmsilçisi Bəylər Talıbov, Almatı İqtisadiyyat və Statistika Akademiyasının prorektoru Lidya Bekenova və digərləri diqqəti hazırda ölkələrimizin münasibətlərinin yüksək strateji tərəfdaşlıq səviyyəsində olmasına yönəldiblər və bu cür tədbirlərin təşkilinin əlaqələrin dinamikasına töhfəsini verəcəyinə inandıqlarını vurğulayıblar.

Qeyd edək ki, layihə Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilir.

АZƏRTAC

Almaniya XİN: AŞ-nın monitorinq institutlarının Dağlıq Qarabağ və Azərbaycanın 7 ətraf rayonuna girişi təmin edilməlidir

20.05.2017 | 12:17

161854-1

Avropa Şurasının monitorinq institutlarının Dağlıq Qarabağa və Azərbaycanın 7 ətraf rayonuna maneəsiz girişinin təmin olunmasının vaxtı çatıb.

 

APA-nın “Ukrinform”a istinadən verdiyi məlumata görə, bu sözləri Almaniyanın Xarici İşlər Nazirliyinin dövlət naziri Mixael Rot AŞ Nazirlər Komitəsinin Kiprdə keçirilən 127-ci sessiyasında çıxışı zamanı deyib.

 

O çıxışında eyni vəziyyətin Abxaziya və Cənubi Osetiya, Denstryanı, həmçinin Krıma aid olduğunu da bildirib: “Rusiya tərəfindən ilhaq olunmuş Krımda, həmçinin Şərqi Ukraynada separatçıların nəzarətində olan ərazilərdə insan haqlarının vəziyyəti böyük narahatlıq yaradır. AŞ-nın insan haqları üzrə səlahiyyətlisinin və digər monitorinq institutlarının bu regionlara maneəsiz girişinin təmin olunmasının vaxtı çatıb”.

 

O, AŞ-nin baş katibi Tyorbörn Yaqlandı bu istiqmətdə qətiyyətli şəkildə öz səylərini davam etdirməyə çağırıb.

 

Apa.az

Müdafiə Nazirliyi: Ermənistan ordusunda qeydə alınan döyüş və qeyri-döyüş itkilərinin sayı 50-yə yaxındır

19.05.2017 | 11:14

498

Daxili ictimai-siyasi vəziyyətin gərginləşməsindən və cəmiyyətin son zamanlar onsuz da nüfuzdan düşmüş orduya qarşı nifrətinin artacağından ehtiyat edən Ermənistanın hərbi-siyasi rəhbərliyi orduda baş verən ölüm hallarının sayını təhrif etməklə əvvəlki illərdə olduğu kimi, həqiqəti ölkə ictimaiyyətindən gizlətməkdə davam edir.

Bunu AZƏRTAC-ın sorğusuna cavab olaraq Müdafiə Nazirliyinin mətbuat xidmətindən bildiriblər.

Nazirlikdən deyiblər ki, aparılan araşdırmalara əsasən, 2017-ci ilin yanvar ayından hazırkı vaxta qədər Ermənistan ordusunda döyüş və qeyri-döyüş itkilərinin sayı rəsmi şəkildə göstərildiyi kimi 26 deyil, 50 nəfərə yaxındır. Bunu sübut etmək üçün ordudakı itkilərlə bağlı cari il ərzində Ermənistan KİV-lərinin dərc etdiyi məlumatları izləmək kifayət edər. Hələ bu da Ermənistan ordusundakı itkilər barədə tam həqiqəti əks etdirmir. Nəzərə alsaq ki, işğal olunmuş ərazilərimizdə yaşayan ermənilərdən olan çağırışçılar və buraya dünyanın müxtəlif qaynar nöqtələrindən cəlb edilən erməni əsilli muzdluların qeydiyyatı aparılmır, bu rəqəm xeyli dərəcədə artıqdır.

AZƏRTAC

ATƏT MQ həmsədrləri Dağlıq Qarabağ münaqişəsi zonasında gərginliyin artmasına dair bəyanat yayıblar

19.05.2017 | 10:55

atet (1)

ATƏT Minsk Qrupunun həmsədrləri yaydıqları birgə bəyanatda Dağlıq Qarabağ münaqişəsi zonasında son günlər atəşkəs rejiminin pozulması hallarını pisləyərək, tərəfləri gərginliyin aradan qaldırılması istiqamətində tədbirlər görməyə çağırıblar.

 

APA-nın məlumatına görə, sənəddə zərbələrin endirildiyi obyektlərə, habelə qurbanlar və dəymiş zərərə dair ziddiyyətli məlumatların olduğu qeyd edilir.

 

“Həmsədrlər atəşkəs rejiminin pozulması hallarını pisləyirlər və tərəfləri gərginliyin artmasının qarşısını almaq üçün zəruri tədbirlər görməyə çağırırlar”, – deyə həmsədrlərin birgə bəyanatında bildirilir.

 

Məlumata görə, həmsədrlər və ATƏT sədrinin şəxsi nümayəndəsi vəziyyət barədə daha dolğun və dəqiq informasiya əldə etmək üçün əlavə məlumatlar toplamaqda davam edirlər.

 

Qeyd edək ki, Ermənistan cəbhə xəttində vəziyyəti yenidən gərginləşdirmək məqsədilə təxribat xarakterli fəaliyyətini davam etdirir. Belə ki, mayın 15-də cəbhənin FüzuliXocavənd istiqamətində Ermənistan hava hücumundan müdafiə qoşunlarına məxsus “OSA” zenit-raket kompleksi hərbi qulluqçular tərəfindən müdafiənin ön xəttində yeni mövqeyə çıxarılaraq hava məkanını nəzarətə götürməyə cəhd göstərilib.

 

Azərbaycanın uçuş aparatlarına yaranan real təhlükənin və düşmənin aktivliyinin qarşısını almaq məqsədilə Ermənistanın “OSA” zenit-raket kompleksi və nəqliyyat-doldurucu maşını atəşlə tam sıradan çıxarılıb, şəxsi heyəti məhv edilib.

 

Bundan başqa, mayın 16-da axşam saatlarından başlayaraq gecə ərzində Ermənistan silahlı qüvvələrinin bölmələri cəbhə xəttinin Ağdam istiqamətində Azərbaycan ordusunun mövqelərini və müdafiənin dərinliyində yaşayış məntəqələrini müxtəlif çaplı minaatanlardan intensiv atəşə tutub. Cavab tədbirləri nəticəsində düşmən susdurulub. Azərbaycan Silahlı Qüvvələrin döyüş texnikasına ziyan dəyməyib və şəxsi heyət arasında itki yoxdur. Atılan mərmilər əsasən boş əkin sahələri və yaşayış məntəqələrinə yaxın ərazilərə düşüb. Əməliyyat şəraiti Azərbaycan Silahlı Qüvvələrimizin tam nəzarəti altındadır.

 

Qeyd edək ki, Dağlıq Qarabağ münaqişəsinin müasir mərhələsi 1988-ci ildə Ermənistan  SSR-in Azərbaycan SSR-ə qarşı ərazi iddiaları əsasında başlayıb. 1991-1994-cü illərdə Azərbaycanın Dağlıq Qarabağ ərazisi uğrunda Ermənistanla Azərbaycan arasında şiddətli müharibə baş verib. Nəticədə Azərbaycan ərazilərinin 20 faizi – Dağlıq Qarabağ və ətraf 7 inzibati rayon (Laçın, Kəlbəcər, Ağdam, Füzuli, Cəbrayıl, Qubadlı, Zəngilan) Ermənistan Silahlı Qüvvələri tərəfindən işğal olunub, 1 milyondan artıq insan qaçqın və məcburi köçkün vəziyyətinə düşüb.

 

Hərbi əməliyyatlar 1994-cü ilin may ayında Bişkekdə Azərbaycan və Ermənistan arasında imzalanmış atəşkəs sazişi ilə başa çatıb. Dağlıq Qarabağ münaqişəsinin həlli ilə ATƏT-in Minsk qrupu məşğul olur. Qrup ATƏT-in Nazirlər Şurasının 1992-ci ilin 24 martında Helsinkidə keçirilmiş görüşündə yaradılıb. Qrupun üzvləri Azərbaycan, Ermənistan, Rusiya, Amerika Birləşmiş Ştatları, Fransa, Polşa, Almaniya, Türkiyə, Belarus, Finlandiya və İsveçdir. 1996-cı ilin dekabrından onun Rusiya, ABŞ və Fransadan ibarət həmsədrlik institutu fəaliyyət göstərir.Ermənistan qoşunlarının Dağlıq Qarabağdan qeyd-şərtsiz çıxarılması ilə bağlı BMT Təhlükəsizlik Şurasının 1993-cü ildə qısa fasilələrlə qəbul edilmiş 822, 853, 874 və 884 saylı qətnamələri, o cümlədən BMT Baş Assambleyası, AŞPA, ATƏT, İƏT və digər təşkilat və qurumların qətnamələri mövcuddur.

 

Apa.az