Azərbaycanca

XƏBƏR

Azərbaycanlıların Soyqırımı Gününün 100-cü ildönümləri ilə bağlı “İnsanlığa qarşı cinayətlər-etnik təmizləmə və soyqırımları” mövzusunda seminar keçirib

22.02.2018 | 15:34

Azərbaycanının Pakistandakı səfirliyi bu ölkənin Xarici İşlər Nazirliyinin Strateji Tədqiqatlar İnstitutu ilə birgə Xocalı soyqırımının 26-cı və 31 Mart – Azərbaycanlıların Soyqırımı Gününün 100-cü ildönümləri ilə bağlı “İnsanlığa qarşı cinayətlər-etnik təmizləmə və soyqırımları” mövzusunda seminar keçirib.

Tədbirdə Pakistan Baş nazirinin milli təhlükəsizlik məsələləri üzrə müşaviri, ehtiyatda olan general-leytenant Nasir Xan Cancuan, Strateji Tədqiqatlar İnstitutunun direktoru, səfir Xalid Mahmud, Kayde Əzəm Universitetinin beynəlxalq əlaqələr fakültəsinin professoru Zafar Caspal, Türkiyə, Özbəkistan və Tacikistanın Pakistandakı səfirləri, yüksək rütbəli diplomatlar, tədqiqatçılar, ictimaiyyət nümayəndələri və jurnalistlər iştirak ediblər.

Əvvəlcə soyqırımı qurbanlarının xatirəsi bir dəqiqəlik sükutla yad olunub, Xocalı faciəsi ilə bağlı sənədli film nümayiş etdirilib. Foyedə bu faciəni əks etdirən fotostend açılıb. Ermənistan-Azərbaycan, Dağlıq Qarabağ münaqişəsinə, Azərbaycan həqiqətlərinə dair kitablar, bukletlər və digər əyani materiallar nümayiş etdirilib, iştirakçılara paylanılıb.

Seminarı açan Strateji Tədqiqatlar İnstitutunun direktoru Xalid Mahmud “Böyük Ermənistan” xülyası ilə yaşayan erməni ekstremistlərinin tarixən Azərbaycana qarşı etnik təmizləmə siyasəti yeritdiyini, 1918-ci ilin mart ayında azərbaycanlılara qarşı kütləvi qırğınlar törətdiyini, ölkəmizə səfəri zamanı Quba soyqırımı məzarlığında bu qəddarlığın şahidi olduğunu qeyd edib. O, Ermənistan tərəfindən törədilmiş, tarixin ən qəddar hadisələrindən olan Xocalı soyqırımının artıq bir neçə ölkə tərəfindən tanındığını vurğulayıb.

Kayde Əzəm Universitetinin professoru Zafar Caspal bəşəriyyət əleyhinə cinayətlərə siyasi baxımdan zamanında lazımi qiymət verilmədiyini, ikili standartlar səbəbindən dünyanın aparıcı dövlətlərinin Ermənistan tərəfindən törədilmiş soyqırımlarına, o cümlədən Xocalı soyqırımına ədalətli münasibət göstərilmədiyini təəssüflə diqqətə çatdırıb.

Türkiyənin Pakistandakı səfiri İhsan Mustafa Yurdakul Ermənistanın azərbaycanlılara qarşı törətdiyi Xocalı soyqırımının türk xalqının qəlbini daim ağrıtdığını, Azərbaycanın ağrı-acısının Türkiyənin də ağrı-acısı olduğunu vurğulayıb. Azərbaycanın suverenliyi və ərazi bütövlüyünün bərpa edilməsinin zəruriliyini vurğulayan diplomat bununla bağlı BMT Təhlükəsizlik Şurasının qəbul etdiyi dörd qətnamənin icrasının vacibliyini vurğulayıb. Bəzi dövlətlərin müsəlmanlara, xüsusilə də türklərə qarşı ayrı-seçkiliyə yol verdiyini bildirən səfir Ermənistanın 1915-ci il hadisələrinə dair əsassız iddia ilə çıxış etdiyini söyləyib, bu ölkənin türklərə qarşı etnik təmizləmə siyasətindən əl çəkməli olduğunu vurğulayıb.

Son 100 ildə “Böyük Ermənistan” dövlətinin yaradılması xülyaları ilə yaşayan erməni millətçiləri tərəfindən azərbaycanlılara, ümumilikdə, türklərə qarşı törədilən terrorçuluq və etnik təmizləmə siyasəti haqqında məlumat verən Azərbaycanın Pakistandakı səfiri Əli Əlizadə ermənilərin 1905-1907-ci və 1918-1920-ci illərdə azərbaycanlılara qarşı genişmiqyaslı cinayətlər törətdiyini, yalnız Azərbaycanda deyil, Türkiyə, İran və bir sıra digər ölkələrdə də qətliamlar həyata keçirdiklərini deyib.

2010-2016-cı illərdə Təbrizdə Azərbaycanın baş konsulu işlədiyi vaxtlarda ermənilərin törətdiyi qırğınların hələ də Təbriz, Urmiya, Xoy və Səlmas əhalisinin yaddaşında qalmasının bilavasitə şahidi olduğunu ifadə edən səfir ermənilərin sistemli şəkildə azərbaycanlılara qarşı soyqırımı siyasətini reallaşdırmağa çalışdığını, 1992-ci ildə Xocalını yerlə-yeksan etdiyini və qədim Azərbaycan tarixini əks etdirən abidələri, muzeyləri və məscidləri tamamilə dağıtdığını qeyd edib. Ə.Əlizadə ümummilli lider Heydər Əliyevin “Xocalı faciəsi iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamıdır və ən qanlı səhifəsidir” fikrini sitat gətirib.

Diplomat Xocalı soyqırımını tanıyan ölkələrin sayının ilbəil artdığını bildirərək, 2012-ci ildə Pakistan Senatının xarici əlaqələr komitəsinin və 2017-ci ildə Pakistan Milli Assambleyasının xarici işlər komitəsinin Xocalı soyqırımını tanıması və Ermənistanın Azərbaycan torpaqlarının işğalını sərt şəkildə qınamasına görə Pakistan xalqına və dövlətinə minnətdarlığını çatdırıb. Səfir beynəlxalq hüquqa və BMT-nin qətnamələrinə əsaslanaraq, dünya birliyini təcavüzkarın qarşısının almağa və soyqırımı törədənlərə qarşı praktik addımlar atmağa çağırıb.

Xüsusi qəddarlıqla törədilən Xocalı soyqırımının tarixin ən ağrılı cinayətlərindən olduğunu və Pakistanın hər zaman Azərbaycanın dərdinə şərik çıxdığını bildirən Nasir Xan Cancua 1991-ci ildə müstəqilliyini bərpa etdikdən sonra Azərbaycanla Pakistan arasında çox səmimi dostluq və qardaşlıq münasibətlərinin yarandığını və bütün sahələr üzrə inkişaf etdiyini diqqətə çatdırıb. Hərbçi general kimi müxtəlif döyüşlərin şahidi olduğunu, amma Xocalıda silahsız insanlara qarşı edilmiş vəhşiliklərin misli görünmədiyini deyən Baş nazirin müşaviri Pakistanın Ermənistan-Azərbaycan, Dağlıq Qarabağ münaqişəsində daim Azərbaycanı dəstəklədiyini bildirib. Ötən dövr ərzində tərəqqiyə və inkişafa nail olan Azərbaycanın acısının Pakistanın da acısı olduğunu, Kəşmir məsələsində Pakistana verdiyi dəstəyə və Kəşmir üzrə İƏT Təmas Qrupunun üzvü kimi verdiyi töhfələrə görə Azərbaycana təşəkkürünü ifadə edən Nasir Xan Cancua Azərbaycan-Pakistan əlaqələrinin bütün sahələr üzrə daha da inkişaf edəcəyinə əmin olduğunu bildirib.

Seminar Pakistanın televiziyaları və qəzetləri tərəfindən geniş işıqlandırılıb, səfir Əli Əlizadənin müsahibələri televiziyalarda yayımlanıb.

AZƏRTAC

Qulu Kəngərli

AZƏRTAC-ın xüsusi müxbiri

XİN və Baş Prokurorluq Sumqayıt hadisələri ilə bağlı mətbuat konfransı keçirib

22.02.2018 | 15:26

Azərbaycan Xarici İşlər Nazirliyində Baş Prokurorluqla birlikdə 1988-ci ilin fevralında Sumqayıtda baş vermiş hadisələrlə bağlı mətbuat konfransı keçirilib.

APA-nın məlumatına görə, XİN-in mətbuat xidmətinin rəhbəri Hikmət Hacıyev Sumqayıt hadisələrinin Ermənistan və SSRİ-nin xüsusi xidmət orqanları tərəfindən hazırlanaraq törədilən təxribat olduğunu bildirib.

Baş Prokurorluğun mətbuat xidmətinin rəhbəri Eldar Sultanov deyib ki, Sumqayıt şəhərində törədilmiş cinayətlər Ermənistanın uzun illər Azərbaycana, azərbaycanlılara qarşı yürütdüyü etnik təmizləmə, ərazi iddiaları, terror və soyqırım siyasətinin tərkib hissəsidir: “Ötən illər ərzində erməni separatçıları öz işğalçılıq siyasətlərinə, Xocalısoyqırımına və Azərbaycan torpaqlarında törətdikləri digər cinayətlərə bəraət qazandırmaq üçün Sumqayıt hadisələrinə istinad edir, öz yalanlarını həqiqət kimi təqdim etmək məqsədilə faktların təhrif olunması, sənədlərin saxtalaşdırılması və digər çirkin üsullara əl atırlar. Sumqayıt şəhərində təşkil olunmuş kütləvi iğtişaşlarla əlaqədar 1988-1990-cı illərdə aparılmış istintaq və məhkəmə prosesləri nəticəsində həmin hadisələrə obyektiv hüquqi qiymət verilməyib, hadisənin əsl sifarişçiləri və təşkilatçıları müəyyən edilərək məsuliyyətə cəlb olunmayıb. Məhz qeyd etdiklərim Sumqayıt hadisələrinin yenidən araşdırılması zərurətini yaradıb. Baş Prokurorluğun veb-saytında “Sumqayıt hadisələri” bölməsi fəaliyyətdədir ki, həmin bölməyə daxil olmaqla istintaq materialları, eyni zamanda erməni vəhşiliklərini özündə əks etdirən, bir neçə dilə tərcümə olunmuş filmlərlə tanış olmaq imkanı əldə edə bilərsiniz”.

Sumqayıt hadisələri ilə bağlı yaradılmış istintaq-əməliyyat qrupunun üzvü, Baş Prokurorluğun Ağır Cinayətlərə dair İşlər üzrə İstintaq İdarəsinin xüsusilə mühüm işlər üzrə böyük müstəntiqi Nadir Mirzəyev qeyd edib ki, 1991-ci ilin avqust ayında Moskvada baş vermiş dövlət çevrilişinə cəhd faktına dair başlanmış cinayət işi üzrə yaradılan istintaq qrupunun üzvləri SSRİ daxili işlər naziri Boris Puqonun xidməti otağında axtarış apararkən rəflərdəki sənədlərin arasında Ahıska türklərinin Özbəkistandan qovulması, Dağlıq Qarabağ və digər hadisələrlə əlaqədar ayrı-ayrı qovluqlar tapılıb, onlar vərəqlənərkən Dağlıq Qarabağda fəaliyyət göstərmiş “Krunk” təşkilatı, Qarabağda baş verən hadisələr barədə SSRİ DİN-ə ilk günlərdən məlumatların daxil olduğu müəyyən edilib: “Bu məlumatlar həm Ermənistan və Azərbaycan Daxili İşlər nazirliklərinin arayışlarından, həm də SSRİ DİN-in müvafiq idarələrin məlumatlarından ibarət idi. Bəlli olub ki, baş verən bütün hadisələr barədə SSRİ rəhbərliyinin ilk günlərdən məlumatı olub, lakin məqsədli şəkildə hərəkətsizliyə yol verilib”.

Müəyyən edilib ki, ekstremist ideyaların daşıyıcısı olmuş Bakı şəhər sakini Valeri Markaryan Sumqayıtda avtobusu küçədə dayanmış dinc sakinlərin üstünə sürərək 5 azərbaycanlını qəsdən öldürüb. İstintaqla V. Markaryanın Sumqayıt şəhərində fəaliyyət göstərmiş ekstremist millətçi ermənilərlə əlaqələri müəyyən edilib. O da müəyyənləşdirilib ki, Sumqayıt şəhərində törədilmiş kütləvi iğtişaş zamanı erməni ailələri onların azərbaycanlı qonşuları və tanışları tərəfindən öz mənzillərində gizlədilməklə basqın, talan və digər zorakılıq təhlükəsindən xilas olublar. Həmin dövrdə Ermənistanın daşnak-kommunist dairələrinin “vəhşi, qaniçən azərbaycanlı” obrazını yaratmağa hesablanmış təbliğat cəhdlərinin əksinə olaraq, Sumqayıt şəhərində məhz ermənilərin zorakılığına məruz qalan ermənilər öz azərbaycanlı qonşuları tərəfindən xilas ediliblər. Bu faktlar cinayət işinin materialları ilə yanaşı, məhkəmələrin, o cümlədən Rusiya məhkəmələrinin xüsusi qərardadlarında əksini tapıb.

Sonda Xarici İşlər Nazirliyi və Baş Prokurorluğun 1988-ci il Sumqayıt hadisələri ilə əlaqədar birgə bəyanatı qəbul edilib.

APA

XİN: Fransa Xarici İşlər Nazirliyindən olan həmkarlarımıza Ermənistanın dezinformasiyasına uymamağı tövsiyə edirik

21.02.2018 | 15:51

Digər həmsədr ölkələrlə birlikdə 25 ildən artıq Ermənistan-Azərbaycan, Dağlıq Qarabağ münaqişəsinin həlli ilə məşğul olan Fransa da çox yaxşı bilir ki, regionda gərginliyin əsas səbəbi Ermənistanın gücdən istifadə edərək Azərbaycan ərazilərinin hərbi işğalını davam etdirməsidir. Ermənistan ərazisində və işğal olunmuş ərazilərdə Ermənistan tərəfindən bir milyondan artıq azərbaycanlıya qarşı etnik təmizləmə törədilib və bunun nəticəsində 90-cı illərin əvvəllərində Azərbaycan II Dünya müharibəsindən sonra Avropanın ən böyük humanitar fəlakətini yaşayıb.

Bu fikirləri Azərbaycan Xarici İşlər Nazirliyinin mətbuat Xidmətinin rəhbəri Hikmət Hacıyev Fransa Xarici İşlər Nazirliyinin açıqlamasını şərh edərkən bildirib.

Hikmət Hacıyev deyib ki, Ermənistan BMT Təhlükəsizlik Şurasının (TŞ) məlum qətnamələrinin qoşunlarının Azərbaycanın işğal olunmuş ərazilərindən qeyd-şərtsiz və tam çıxarılmasına, məcburi köçkünlərin öz doğma torpaqlarına qayıtmasının təmin edilməsinə dair tələblərini hələ də yerinə yetirmir. Azərbaycan Respublikası Prezidentinin azərbaycanlıların beynəlxalq sənədlərdə və BMT TŞ-nin qətnamələrində təsbit olunduğu kimi, sülh şəraitində öz tarixi torpaqlarına qayıtması barədə açıqlaması münaqişənin həlli prosesinin vacib humanitar prinsiplərindən biridir. Münaqişənin həlli üzrə danışıqlar getdiyi halda, ATƏT-in Minsk qrupunun həmsədri və BMT Təhlükəsizlik Şurasının daimi üzvü kimi Fransanı və digər həmsədrləri Ermənistanın Azərbaycanın işğal olunmuş ərazilərinin anneksiyası məqsədilə həyata keçirdiyi qeyri-qanuni əməlləri, o cümlədən ərazinin demoqrafik tərkibinin dəyişdirilməsi və Azərbaycan xalqının maddi-mədəni və dini irsinin məhv edilməsi halları ciddi narahat etməlidir. Bu xüsusda ciddi narahatlıq doğuran məqamlardan biri də Fransanın Xarici İşlər Nazirliyinin və Daxili İşlər Nazirliyinin mərkəzi təlimatına və ATƏT-in Minsk qrupunun həmsədri kimi Fransanın statusuna zidd olaraq, Fransanın regionlarının qondarma rejimlə qanunsuz əlaqələr yaratması və qondarma rejimin nümayəndələrinin Şengen viza qaydalarının tələblərini pozaraq Fransa ərazisinə daxil olmaları və təbliğatla məşğul olmalarıdır.

“Həmçinin Fransa tərəfini Ermənistan prezidenti Serj Sarkisyanın Azərbaycanın Dağlıq Qarabağ bölgəsində aqressiv separatizmin 30 illiyi ilə əlaqədar qondarma rejimə ünvanlandığı 20 fevral tarixli təbrikinə diqqət yetirməyə çağırırıq. Ermənistan prezidenti Azərbaycana qarşı terror, aqressiv separatizm, işğal, təcavüz və qanlı etnik təmizləmə nəticəsində yaradılmış qondarma rejimi nailiyyət kimi təqdim edir və Azərbaycanın suveren ərazilərinin anneksiyasına çağırır. Hesab edirik ki, beynəlxalq terrorizmdən əziyyət çəkən Fransanı Ermənistan prezidentinin bu təbrik məktubunda Fransa ərazisində də qanlı terror törədən və günahsız Fransa vətəndaşlarını qətlə yetirən terrorçu Monte Melkonyandan qəhrəman kimi iqtibas gətirilməsi ciddi narahat etməlidir.

Fürsətdən istifadə edərək, Fransa Xarici İşlər Nazirliyindən olan həmkarlarımıza Ermənistan və Fransada olan erməni lobbi dairələrinin dezinformasiya və təbliğatına uymamağı tövsiyə edirik”, – deyə XİN-in sözçüsü qeyd edib.

AZƏRTAC

ATƏT Azərbaycan-Ermənistan sərhədində monitorinq keçirib

21.02.2018 | 15:41

ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, fevralın 20-də Azərbaycan və Ermənistan dövlət sərhədinin Qazax rayonu istiqamətində monitorinq keçirilib.

MN-dən APA-ya verilən məlumata görə, monitorinq insidentsiz başa çatıb.