Azərbaycanca

XƏBƏR

Baş nazirin müavini: “265 min qaçqın və məcburi köçkünün mənzil-məişət şəraiti yaxşılaşdırılıb”

21.02.2018 | 15:18

“İndiyə qədər qaçqın və məcburi köçkünlər üçün salınmış qəsəbə və yaşayış komplekslərinin mənzil fondu Mingəçevir şəhərinin mənzil fondundan iki dəfə çoxdur”.

Bunu baş nazirin müavini, Qaçqınların və Köçkünlərin İşləri üzrə Dövlət Komitəsinin sədri Əli Həsənov “Respublika” qəzetində dərc olunan “Qaçqın və məcburi köçkünlərin dövlət siyasətinin prioritet sosial problemlərinin həlli istiqamətlərindədir” başlıqlı məqaləsində yazıb.

Ə. Həsənov qeyd edib ki, qaçqın və məcburi köçkünlər üçün indiyədək ümumilikdə 3,3 milyon kvadratmetr yaşayış sahəsi olan 97 müasir qəsəbə və çoxmərtəbəli binalardan ibarət yaşayış kompleksləri salınıb: “Yeni qəsəbələrdə insanların rahat yaşaması, uşaqların təhsil alması, sağlamlıqlarının qorunması məqsədilə bütün zəruri sosial obyektlərlə yanaşı, texniki infrastruktur da yaradılıb. Başqa sözlə, 153 məktəb, 59 mədəniyyət, 60 səhiyyə müəssisəsi, 61 uşaq bağçası, 2 Olimpiya İdman Kompleksi tikilib, 745 kilometr yol, 985 kilometr su, 1720 kilometr elektrik, 487 kilometr qaz xətti çəkilib.  Məcburi köçkünlər üçün ən böyük təhsil ocağı – 1300 şagird yerlik məktəb 2012-ci ildə Qaradağ rayonunun Müşfiqabad qəsəbəsində, gücünə görə (280 meqavat) ən böyük elektrik yarımstansiyası 2007-ci ildə Ağcabədi rayonunda istifadəyə verilib. İndiyədək 52 min 300 ailə və ya 265 min nəfər qaçqın və məcburi köçkünün mənzil-məişət şəraiti yaxşılaşdırılıb ki, bundan 48 min 300 ailə, yaxud 245 min nəfər son 14 ilin payına düşür. Qaçqın və məcburi köçkünlərin sosial problemlərinin həlli üçün son 24 ildə 6,6 milyard manat vəsait sərf olunub. Ondan 3,1 milyard manat dövlət büdcəsinin, 2,1 milyard manat Dövlət Neft Fondunun, 1,4 milyard manat isə beynəlxalq maliyyə qurumları və ölkəmizdə fəaliyyət göstərən beynəlxalq humanitar təşkilatların vəsaitidir. Son 14 ildə məcburi köçkünlərə aylıq yemək xərci üçün verilən müavinətin məbləği 4 dəfə, kommunal xidmətlərə görə vəsaitin miqdarı 4,5 dəfə artırılıb”.

APA

Ermənistan silahlı qüvvələrinin bölmələri sutka ərzində atəşkəs rejimini 135 dəfə pozub

21.02.2018 | 15:08

Müdafiə Nazirliyinin mətbuat xidmətindən verilən məlumata əsasən, Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 135 dəfə pozub.

Ermənistanın Noyemberyan rayonunun Dovex, Şavarşavan kəndlərində və adsız yüksəkliklərdə, İcevan rayonunun Berkaber, Paravakar kəndlərində və adsız yüksəkliklərdə yerləşən mövqelərdən Qazax rayonunun Kəmərli, Fərəhli, Qızılhacılı kəndlərində və adsız yüksəkliklərdə, Berd rayonunun Mosesqex kəndində və adsız yüksəkliklərdə yerləşən mövqelərdən Tovuz rayonunun Ağdam, Koxanəbi kəndlərində və adsız yüksəkliklərdə, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.

Tərtər rayonunun işğal altında olan Çiləbürt, Ağdam rayonunun Şıxlar, Baş Qərvənd, Cəvahirli, Qaraqaşlı, Yusifcanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Aşağı Seyidəhmədli, Kürdlər, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Goranboy, Tərtər, Ağdam, Xocavənd, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.

 

Milanda Xocalı faciəsindən bəhs edən “Günahsız” adlı şeirlər toplusunun təqdimatı olub

14.02.2018 | 13:15

İtaliyanın Milan şəhərində şairə Maddalena Capalbinin Xocalı faciəsindən bəhs edən “Günahsız” adlı şeirlər toplusunun təqdimatı olub.

Diasporla İş üzrə Dövlət Komitəsindən AZƏRTAC-a bildiriblər ki, təqdimat Milan Bələdiyyəsinin hər ay təşkil etdiyi “Milan poeziya ilə qovuşdu” layihəsi çərçivəsində baş tutub. Layihənin məqsədi insanları poeziyaya daha da yaxınlaşdırmaq, poetik dillə həm bədii, həm də sosial mesajlar verməkdir.

Palazzo Marino Milan administrasiyası binasında keçirilən M.Capalbi ilə görüşdə şəhər bələdiyyəsinin rəhbərliyi, yazıçı və şairlər, jurnalistlər, Cüzeppe Verdi adına Milan Dövlət Konservatoriyasının professor və tələbə heyəti, musiqiçilər və digər sənətlərin təmsilçiləri, iş adamları və təşkilat rəhbərləri iştirak ediblər. Tədbirdə rejissorluğu və aparıcılığı Milan Konservatoriyasının professoru, bəstəkar-şair Azərbaycan Yazıçılar İttifaqinin üzvü Davide Gualtieri edib.

Gənc yaşlarından poeziyaya həvəs göstərən M.Capalbi uzun illər Milanın Respublika Prokurorluğunda kansler vəzifəsində çalışsa da, yaradıcılığını davam etdirir və hər il poetik antalogiyalarla çıxış edir. Bu fəaliyyətinə görə şairə 2015-ci ildə “Qızıl Ambrogino” mükafatına layiq görülüb. O, şeirlərində əsasən zülmlərə məruz qalan günahsız uşaqlar və qadınlar haqqında danışır. Müqəddəs qadınları təhqir olunmuş göstərir və qadın obrazını önə çəkir. Qədim vaxtlarda olduğu kimi, bu gün də qadınların zorakılığa məruz qaldığını təəssüflə bildirən şairə bütün təbəqələrdən olan və iztirab çəkən, günahsız, əzablara düçar olmuş qadınları cəsarətlə təsvir edib. Onun fikrincə qan, təcavüz içində yaşayan balaca uşaqlar buna öyrəşərək hətta gülə bilir, həyatın belə olduğuna da inanırlar. Onlarda qorxu, həyəcan o qədər güclüdür ki, azadlıq veriləndə belə onları əsil insan həyatına qaytarmaq çətin olur. Bu anlar onların yaddaşlarına ömürlük həkk olur.

Tədbirin aparıcısı D.Gualtieri bildirib ki, M.Capalbinin qadın və uşaq zorakılığından bəhs edən şeirləri, əslində, ermənilərin Azərbaycanda dinc əhaliyə qarşı törətdikləri amansız qəddarlıqların təsviridir. O, iştirakçılara Xocalıda öz doğma torpaqlarında şəhid olmuş, ata-baba yurdundan didərgin düşənlərin ağrısı haqqında məlumat verib. D.Gualtieri, həmçinin qeyd edib ki, günahkar təkcə faciəni törədənlər deyil, həm də bu faciəni görüb susanlardır.

Şairə M.Capalbi də bu faciədən, ermənilərin azərbaycanlıların başına gətirdiyi müsibətlərdən ətraflı məlumatlı olduğunu deyib. Azərbaycanı yaxşı tanıdığını vurğulayan şairə ölkəmizin dostu olaraq İtaliyada “Azəri” Azərbaycan Mədəniyyət Assosiasiyasının Milanda təşkil etdiyi Xocalı soyqırımına həsr edilən tədbirlərdə iştirak edərək Azərbaycanı hər zaman dəstəklədiyini bildirib. O, azərbaycanlı şair və yazıçılarla dostluq münasibətlərindən də bəhs edib.

Görüşdə M.Capalbinin həyat və yaradıcılığından bəhs olunub, şeirlərindən parçalar səsləndirilib, bəzi şeirlər isə musiqi və rəqslərlə teatrlaşdırılmış şəkildə tamaşaçılara təqdim olunub. Tədbirin bədii hissəsinin yaradıcı heyətində xoreoqraf, İtaliyada Azərbaycan Mədəniyyəti Assosiasiyasının prezidenti Mais Nuriyev də olub.

Dağlıq Qarabağa səfər edən musiqiçisinin adı Azərbaycan XİN-in arzuolunmaz şəxslər siyahısından çıxarılıb

14.02.2018 | 12:58

Argentina Respublikasının vətəndaşı, “Sülh naminə musiqi” layihəsinin üzvü, musiqiçi Xuan Manuyel Domingez Xarici İşlər Nazirliyinə məktubla müraciət edərək adının “Azərbaycan Respublikasının işğal edilmiş ərazilərinə qanunsuz səfər etmiş əcnəbilərin siyahısı”ndan çıxarılmasını xahiş edib.

XİN-in mətbuat xidmətindən AZƏRTAC-a bildiriblər ki, məktubunda Xuan Manuyel Domingez 2015-ci ildə “Sülh naminə musiqi” layihəsi çərçivəsində Dağlıq Qarabağa səfər etdiyini, Azərbaycanın razılığı olmadan həmin əraziyə səfərin qadağan olunduğu və doğuracağı nəticələr barədə məlumatlı olmadığını yazıb. O, bu səfərin Azərbaycan Respublikasına və xalqına qarşı heç bir halda hörmətsizlik anlamı daşımadığını vurğulayıb.

Xuan Manuyel Domingez Azərbaycan Respublikasının qanunlarına hörmət etdiyini qeyd edərək, sözügedən səfərlə əlaqədar Azərbaycan hökuməti və xalqından üzr istədiyini qeyd edib. O, münaqişə nəticəsində bir milyondan artıq azərbaycanlının qaçqın və məcburi köçkün vəziyyətinə düşdüyünü, 20 mindən artıq insanın həlak olduğunu bildirib.

Xuan Manuyel Domingez, həmçinin “Sülh naminə musiqi” layihəsinin Bakıya, xüsusilə Cocuq Mərcanlı kəndinə səfər edərək azərbaycanlı qaçqın və məcburi köçkünlər üçün ustad dərsləri təşkil etmək və xeyriyyə konserti proqramları ilə çıxış etmək arzusunda olduğunu bildirib.

Musiqiçi Xuan Manuyel Domingezin müraciəti müvafiq qaydada nəzərdən keçirilib və onun adının arzuolunmaz şəxslər siyahısından çıxarılmasına dair qərar qəbul edilib.